ألتراس ماميز

 طريقة عمل حمام مغربي ناجح في البيت

يعتبر الحمام المغربي من أكثر الطرق التي تساعد علي تنظيف ونعومة بشرة الجسم وترطيبه لأن الصابون المغربي بيتكون اساسا من الزيتون وزيته ومفيش حد ميعرفش فوايد زيت الزيتون في ترطيب وتغذية البشرة ، وكمان بيساعد علي تنشيط الدورة الدموية وتنشيط عضلات الجسم  ، في هذا الموضوع حقدملك ٨ خطوات مهمة لعمل حمام مغربي ناجح بإذن الله🌸🌸

1-اهم حاجه الجلد ميبقاش عليه زيوت او دهون فممكن تقعدي يومين مثلا مترطبيش جسمك يعني تاخدي شاور من غير ترطيب 

2- قبل ما تدخلي تعملي الحمام افتحي المياه السخنه واملي البانيو واقفلي الشباك والباب وسيبي البانيو يتملي وانقعي الليفه في مياه ساخنة.

3- ادخلي بقه وهاتي جنبك ازازه مياه عشان لو بتدوخي من البخار واقعدي في البانيو ربع ساعه تقريبا. 

4- افردي الصابون ولو هو تقيل شويه ممكن تضفيله شويه مياه ساخنة صغيرين عشان تعرفي تفرديه وسبيه من 10 -15 دقيقه طيب نعمل ايه في الوقت ده ممكن تغسلي سنانك مثلا  قصي ضوافرك اعملي سكراب لوجهك.

5- اشطفي جسمك كويس جدا من الصابون مش عايزين عليه اي اثار للصابون 

6-اهم نقطه بقه هي انك تبدأي تشتغلي بالليفه بعد ما جسمك يندي ويبدأ يجف يعني لا مبلول اوي ولا ناشف اوي الخطوه دي بتفرق جدا👌

7- اشتغلي بالليفه في اتجاه واحد الساق مثلا من تحت لفوق مع ضغطه خفيفه مش عايزين نتعور ومش عايزاكي تتخضي من المنظر اللي حيطلع 😅 ونوع الليفه بيفرق علي فكره فيه انواع مش حلوه اسألي حد مجرب قبل ما تشتري

8- اخيرا بقه بالتجربه ومن تجارب ناس قالوا ان الجسم محتاج يتعود علي الحمام المغربي يعني ممكن مرتين تلاته ميطلعش جلد ميت متيأسيش استمري وحيظبط معاكي ومتنسيش الترطيب بعده وبس كده يا رب اكون قدرت أفيدكم🌼🌼

كلمات البحث

الحمام المغربي فوائد

مستلزمات الحمام المغربي

خطوات الحمام المغربي في الصالونات

طريقة عمل الحمام المغربي في المنزل

طريقة استخدام الحمام المغربي الجاهز

الحمام المغربي للعرائس

مكونات الحمام المغربي من العطار

أضرار الحمام المغربي