سمعنا كتير عن زوجات بتشتكي من إن ازواجها شايلين أيديهم من مسؤليات البيت ومجرد بيمولوهم كل اول شهر وهما اللي مسؤلين عن كل حاجة متعلقة بالمعيشة والأولاد ودراستهم لحد ما يوصلوا لمرحلة من الانفجار وما يتبعه من طلب الطلاق.... طيب خلينا بس الأول نعرف نقطتين مهمين في شخصية الراجل والست قبل ما نعرف حل المشكلة دي.
أولا: الراجل بطبعه بيتحفز بتقدير مجهوده ودوره وأنه عامل فعال وانه طول الوقت جهده مطلوب ولما مش بيلاقي التقدير ده يبدأ ينسحب ويبقي سلبي وتتهز ثقته في نفسه زائد انه بيخاف من الفشل بيخاف يتحمل مسؤلية وما ينجحش فيها ولو فشل وملقاش دعم أو تقبل اللي حواليه لفشله بيحجم عن تحمل المزيد من المسؤليات.
ثانيا: في اعتقاد خاطئ عند المرأة أنها لازم تدي كتير عشان تلاقي تقدير واحترام يعني تقدير الغير لذاتها مرتبط بقدرتها علي العطاء لذلك بتفضل تدي "بلاحدود" لحد الطرف التاني ما يتعدي حدوده سواء في كثرة الطلبات أو التعدي عليها بالإهانة وكأن ده العادي والمفروض.
نرجع بقي لمشكلتنا....اللي بيحصل أن الزوجة بتفضل تدي كتير تروح وتودي وتجيب وحاضر ونعم وتيجي علي نفسها لحد ما هو يتعود ويحس انه "وجوده زي عدمه" وخاصة لو طلبت منه حاجة ومعملهاش مظبوط فتنتقد وتعيب فيبدأ يتهز ويفضل الانسحاب تجنبا لأي نقد لأن " الرجالة مش بتحب النقد" ومن هنا بتبدأ المشكلة.
طيب والحل... الحل أن الزوجة تحد حدود مش كل حاجة هي مسؤولة عنها فيه مشاركة بينهم وتزيد لما الطرفين يكونوا بيشتغلوا تبدأ تطلب منه وتحسسه انها محتجاه عشان تحفزه وتعترض لو زود عليها الطلبات ولكن باحترام وباسلوب كويس عشان ما تقلبش بخناقة وتفهموا انها تعبت من الحمل الزايد ومحتجا. معاها ولازم كمان يبقي فيه حدود في التعامل مفيش تعدي لا عليها ولا عليه ولازم يكون فيه تقبل للفشل أو الأخطاء وتقدير لمجهود الطرفين لأن ببساطة هما بيكملوا بعض.