حواء كائن عاطفي بطبعه يحب دايما يحس انه مرغوب ومرحب به طول الوقت واكتر حاجة بتوجعها هي " التطنيش" ولكن قله اهتمام الزوج بزوجته اذا لم تكن مقصودة منه فبيكون سببها عادة هي "المشاكل" بمعني أن الراجل لما بتقابله مشكلة بيفضل انه" يلجأ لكهفه" ينعزل عن العالم نادرا لما يتكلم عن مشكلته ويبدأ يركز في حلها لو حلها يبدأ يخرج من الكهف ده محلهاش يبدأ يدور علي حاجة تسهيه يقرأ الجرنال يشوفله ماتش يلعب كرة أي حاجة تخرجه من المود شويه عشان يرجع تاني يفكر وفي الوقت ده ما بيكونش بكل انتباهه واهتمامه بالزوجة وده غصب عنه هو تركيبته كدا فتتضايق حواء وتتهمه بالتجاهل.... علي العكس تماما من الست اللي لما بتواجه مشكلة بتحب تتكلم عن مشكلتها وتفضفض يعني مجرد الكلام بالنسبة ليها بيريحها بتحب تتسمع اكتر من تفكيرها في حل المشكلة فلما تحكي لزوجها وتلاقيه حريص انه يحل المشكلة اكتر من أنه يسمعها لأنه عملي بطبعه عايز يحل وينجز أو يتصادف انه كمان متقوقع في كهفه بتبدأ تحس انه مش محتويها ومتفهمها ومن هنا بتبدأ المشاكل والاتهامات بس لو كل واحد فيهم فهم طبيعة تعامل الطرف التاني مع المشكلات مش حتحصل مشكله.